Movie Sky|| موفي سكاي

أولا: عيد سعيد عليكم كلكم وكل سنة وانتوا طيبين ...

ثانيا: انتوا مش معايا فى ان التحرش الجنسى زاد جدا فى شوارعنا؟!! لدرجة إنه باه عندنا عيد للتحرش الجنسى.

انا مش فاهمة بصراحة لغاية امتى هنقف سلبيين أودام الموضوع ده؟!! لازم نبدأ نحاربه ...

وخلونا نبدأ بإننا نسمى الأشياء باسمائها الصحيحة، يعنى مافيش حاجة اسمها "معاكسة" ... مضايقة البنت سواء بالكلمة أو بالحركة أو حتى بالنظرة اسمها "تحرش".

خلينا نسمى الأشياء صح علشان نحس بمدى جرمها، والتحرش فى العادى كوم وفى الأعياد كوم تانى خالص. وانا بحذر من موضوع التحرش الجماعى اللى حصل العيد اللى فات من انه يتكرر العيد ده، لان احنا عندنا حاجة ظريفة جدا. إن اى حدث بيتكرر سنتين ورا بعض فى مناسبة معينة بيبأه سمة من سمات المناسبة دى فيما بعد ... و بيبأه "قانون" انه يتكرر بعد كده. زى حقبة رمضان الفوازيرية كدة ... أخدت وقتها، و لكن دلوقتى بأه خيم وغزو مسلسلات بتنط علينا من التلفزيون حتى وهو مقفول.

وحقيقى انا خايفة ييجى علينا اليوم اللى يكون فيه التحرش الجنسى الجماعى من اهم سمات اعيادنا، ويبأه له راعى رسمى واعلانات فى الشوارع ونقل حصرى للقنوات اللى هتدفع اكتر. و تتحدد له شوارع معينة، وطبعا هتكون سر غير معلن، علشان البنات ماتاخدش حذرها وتبوظ الليلة كلها. فنلاقى اعلان بينط علينا من الشاشة، بيطالب الموهوبين من المتحرشين بالتقدم لمسابقة التحرش الكبرى. و ترصد جوائز مالية وذهب او على الاقل شحن موبايل المتحرش علشان يعرف يتصل بباقى شلة المتحرشين فى العيد.

أونلاقى اعلان تانى بيقول لك "تحرش بواحدة وخد التانية مجانا"، وقناة تنفرد باذاعة مراسم التحرش الجماعى فى العيد و "حصريا على قناة اتحرش" اللى بتنفرد بجملتها الشهيرة "نحن نتحرش بالجمهور" ... ويبأه فية تى شيرتات خاصة عليها اعلانات وأرقام زى تى شيرتات لاعيبة الكورة، ومصانع تشتغل وتعملهم، وعيشة، وأعلام تطبع لمصر عليها لوجو لواحد بيتحرش بالنسر ... ويبأه كرنفال محمى من قبل الدولة ومدعم بعربيات الأمن المركزى ... و تبأه العملية هالوما. قنوات بتتحرش بالجمهور، رجالة بتتحرش بالستات، ستات بتتحرش بالمحلات، حكومات بتتحرش بالشعوب ... وصباح التحرش بأه.. ده هيبأه عيد عالمى ... وساعتها هتنط القنوات الأرضية وتقول لك "مافيش شئ حصرى كله على التلفزيون المصرى" ... وعلى عينك يا تاجر!

وعلشان مانوصلش للمأساة دى يبأه لازم نتصدى لموضوع التحرش ده بقوة ويكون فية قانون رادع للتحرش زى فى احدى الدول الأوروبية مثلا، ناس كمل، بيخصوا المغتصب والمتحرش اذا ما كرر فعل التحرش (أى بيزيلوا أعضاؤه التناسلية)، والله عين العقل ومافيش عقاب رادع وبيجيب من الاخر أكتر من ده.

لكن مش كفاية السجن والتعويض اللى اتحكم بيهم فى قضية "نهى رشدى"، والمأساة ان كتير من البنات مايعرفوش شيئ عن حقوقهم وان المفروض اللى تتعرض لأى نوع من أنواع التحرش تطلع على القسم تبلغ فورا، بس لازم يكون معاها راجل علشان ماتكملش حفلة التحرش فى القسم. أو لو مش عايزة تبلغ وفقدت الثقة فى كل رجالة العالم، وده حقها بصراحة، يبأه لازم تعرف ازاى تدافع عن نفسها الى ان يكون هناك بالفعل من يدافع عنها..

و دى طرق الدفاع عن النفس:

وخلينا نبتدى ونقول لفوزية: جاهزة؟

1) البيروسول: اشمعنى؟ هو ال self defense فى مصر اليومين دول ...
خلى دايما معاكى علبة بيروسول فى شنطتك، واللى يتنفس بس فى قفاكى اتدورى وبخيه فى وشه، ماهو زيه زى الصرصار وهيتقلب على ظهره زيه بالظبط، وتطلعى تجرى انتى ...

2) مصوجر العربية: اشمعنى؟ هيحميكى يا بت انتى وهى ...

خلى ال lock بتاع العربية على طول مقفول علشان ماحدش يقدر يفتح الباب عليكى ويسرق شنطتك او يتحرش بيكى ...

3) ازاز الأبواب: اشمعنى؟ طول ما هو مقفول يمنع عنك الكلاب ...

الرجالة الضالة اللى بتتحرش زيها زى الكلاب الضالة اللى بتعض بالظبط، ودى مش اهانة للراجل اللى من النوعية دى لتشبيهه بالكلب ولكن هى اهانة للكلب السعران لتشبيهه بالراجل المتحرش ...

4) سلاح أبيض: اشمعنى؟ ينفع فى اليوم الاسود ...

خلى معاكى دائما cutter أو Swiss knife فى شنطتك، الحاجات دى لا يحاسب عليها القانون لكن بتنفع وقت اللزوم. مرة كنت فى السينما مع اختى وواحد قاعد جنبها بيحط كوعه فى كوعها، فبدلت معاها وربعت ادية وانا ماسكة فى الايد اللى ناحيته ال cutter، فأول ما حط كوعه، اتجرح فلم نفسه لاخر الفيلم .. بينفع صدقونى ...

5) رياضة عنيفة: اشمعنى؟ رياضة البنت العفيفة ...

لازم نعلم بناتنا اى رياضة للدفاع عن النفس، اما بالنسبة لنا احنا ... ففية رياضات وحركات دفاعية ممكن تدرس فى اى سن زى مثلا الشلوت فى منطقة حساسة او سيف يد فى منطقة تشل، وفية مراكز مخصوصة، بس احنا ندور ...

6) "بن جونسون" حل مريح: اشمعنى؟ اطلقى ساقيكى للريح ...

الجرى نصف الجدعنة و وسيلة جبارة طبعا، لكن لازم تكونى بتعرفى تجرى كويس وده بيتطلب لياقة وجسم لا يعانى من أثار المحشى والكنافة، لازم نتعلم الجرى لانه بيفيد فى حالات كتير ...

7) طقم معاكى احتياطى: اشمعنى؟ علشان لو قطع هدومك الواطى ...

وده علشان لو ناوية تخرجى فى العيد مايحصلكيش زى ما حصل لضحية السنة اللى فاتت، لما مالقيتش يا عينى حاجة تسترها لغاية ماراحت لصاحبتها فى البيت ... لأ خليكى ناصحة وخلى طقم معاكى اضافى مخبأ فى مكان ما تحت هدومك. لأن الشنطة بتقع على الأرض فى الحالات دى ...

8) الاتجاه المعاكس: اشمعنى؟ اتحرشى باللى يعاكس ...

وأنا من مزنقى هذا بأطالب بتنظيم حركة معاكسة، الا وهى التحرش بالشباب. والله لو استغلينا ستات مصر الجامدين، اللى الواحدة لو ريحت ايدها بس على واحد هتبططه، فى اننا نوجهم للتحرش بالشباب السيس. ونوريهم اد ايه التحرش ده شيئ مؤلم ومهين. حاجة كده زى اطفاء النار بالنار، يعنى نحارب التحرش بالتحرش المعاكس، صدقونى هيتلموا ويبطلوا ...

9) باب الشقة: اشمعنى؟ تخطى براه فى الأعياد لأه ...

طبعا انا مش بقول تتحبسى فى البيت لكن على الاقل لما تنزلى تحتفلى بالعيد وفى ايدك البالونات ومشغلة "العيد فرحة" وعلى وشك سعادة الخرتيت، وانتى لابسة فستانك الجديد، لازم تكونى مأمنة نفسك كويس. معاكى العيلة، او حتى اولاد الشلة. لان الرجالة بتحمى ساعات لكن ماتعتمديش على كده برضه. وتحاشى وسائل المواصلات العامة، وتحاشى الشوارع المزدحمة والشوارع الفاضية والميادين الكبرى و الصغرى ...

----------

دى اقتراحاتى فى القضية، لكن انتى كمان يا فوزية شغلى مخك وأكيد هتطلعى باقتراحات تانية. بس اهم شئ انك لو قررتى تشيلى اى سلاح فى شنطتك يبأه لازم تكونى بتعرفى تستخدميه، والا ممكن الجانى ياخده منك ويستخدمه ضدك، خلى بالك من النقطة دى.

وطالبى بحقك دايما وماتخافيش يا فوفو يا حبيبتى، مش انتى لوحدك اللى بتعانى، ده كل فوزيات كوكب الأرض ... ولو لا قدر الله وحصل لك أى شئ وحسيتى انك محتاجة مساعدة، او على الأقل انك تتكلمى مع حد. اتصلى بمنظمات وجمعيات المرأة. وفية كمان مراكز اهلية أشهرها "مركز النديم لتأهيل ضحايا العنف" ودى بياناته:

عنوان المركز: 3 أ شارع سليمان الحلبي من شارع رمسيس – القاهرة .
الخط الساخن : 0106662404.
بريد إلكتروني: nadeem@link.net

أمل محمود